Oito razóns concretas. Nada de adxectivos baleiros. Preme en cada unha para ver o detalle.
Gravamos cun DJI Mini 3, tamén en vertical real para reels. Un plano aéreo cambia como se ve un lugar: contexto, escala e paisaxe en poucos segundos. Moitas axencias pequenas non o ofrecen, ou subcontrátano e cóbrano á parte. Aquí forma parte do traballo cando a peza o pide e a normativa e o lugar o permiten.
A persoa que te escoita na primeira chamada é a que grava e a que edita. Sen intermediarios, sen traspasos e sen que se perda polo camiño o que querías contar. Vimos do mundo audiovisual e nótase en como planificamos cada xornada de gravación.
Limitamos o número de marcas para que cada unha reciba tempo, atención e resposta rápida. Non somos unha fábrica de contido. Se estamos completos, avisámoste e apuntámoste en lista de agarda.
Cada publicación pasa un filtro sinxelo: soa á túa marca, importa a quen te segue e recoñécese sen ver o logo. O que non o cumpre, non sae. Preferimos un perfil coherente a un perfil cheo.
Coñecemos o territorio, a luz, os sitios e o ritmo de aquí. Chegamos nun momento, sen desprazamentos que encarezan a produción, e contamos Galicia desde dentro, con respecto e sen postal.
Traballamos con iPhone 17 Pro Max, iPhone 14, Canon EOS 1300D, DJI Mini 3 e luces de apoio. Ao ser material propio, non dependemos de alugueiros, podemos adaptarnos ao teu calendario e non hai custos agochados en cada xornada. Máis abaixo podes ver para que serve cada peza.
Usamos intelixencia artificial para transcribir, subtitular, ordenar ideas e analizar datos. A idea, o ton, a gravación e a decisión final son humanas. Así a túa marca non soa a prantilla.
Levamos o noso propio proxecto de contido, Más de 27 Lugares. Cada formato, cada gancho e cada hora de publicación probouse antes na casa. Non che vendemos teoría: contámosche o que nos funcionou a nós e por que.
Método de traballo
Un proceso claro
Da primeira idea ao informe de resultados, sen sorpresas. Escolle un paso.
Escoitamos que é a túa marca, a quen lle fala e como soa. Definimos a liña editorial, o calendario do mes e os guións das primeiras pezas. Nada se grava sen que o vexas antes.
Xornadas de gravación no teu espazo, con móbil, cámara, luces e dron cando encaixa. Concentramos a produción para que che quite o menor tempo posible e saiamos con material para semanas.
Montaxe vertical para reels, fotografía retocada, subtítulos e textos cunha mesma mirada. Revisas as pezas antes de publicar e axustamos o que faga falta.
Cada mes recibes un informe claro con alcance, retención, gardados, envíos e crecemento, máis tres decisións concretas para o mes seguinte. Sen xerga e sen números de recheo.
Onde traballamos
Axencia de marketing en Santiago de Compostela e A Coruña
Estamos en Santiago de Compostela e traballamos preto de ti. Gravamos en persoa por toda a costa e as cidades galegas, e levamos o marketing online da túa marca desde aquí.
Rías BaixasPlano cenitalPlano aéreo
A Coruña
Lugo
Ourense
Pontevedra
Tamén en liña
Traballamos nas catro provincias galegas. O que se pode facer a distancia levámolo en liña, e desprazámonos cando a gravación o pide.
O noso equipo
Ferramentas propias
Todo o que usamos é noso. Toca unha tarxeta para ver para que serve cada peza.
Cultura e valores
Como traballamos por dentro
O que cremos define con que marcas encaixamos e con que persoas queremos traballar.
Criterio
Escoller é a metade do traballo. Preferimos publicar unha peza recoñecible a dez que poderían ser de calquera.
Elegancia
Unha estética limpa, sobria e coidada. Sen ruído e sen efectos porque si. O que sobra, quítase.
Raíz
Traballamos desde Galicia e para quen a vive. Coñecemos o territorio, a luz e o ritmo, e contámolo con respecto.
Calma
Sen présas absurdas nin urxencias fabricadas. Unha dorna chega lonxe remando con constancia.
Honestidade
Se non encaixamos, avisámoste. Se algo non funciona, explicámolo con datos e propoñemos que cambiar.
Encaixa se
Tes unha marca con carácter e queres que se note.
Prefires publicar con sentido a publicar por publicar.
Buscas un trato próximo, non un provedor máis.
Non encaixa se
Buscas o maior volume de publicacións ao menor prezo.
Queres copiar o que fai a túa competencia.
Esperas resultados de un día para outro.
Traballa connosco
Hoxe somos dous e medramos amodo. Se gravas, editas, escribes ou deseñas con criterio e te recoñeces no que ves aquí, escríbenos co teu portfolio.
Somos dúas persoas que levan anos contando historias en redes co seu propio proxecto, Más de 27 Lugares, e que agora poñen esa experiencia ao servizo doutras marcas.
Vivimos en Santiago de Compostela e traballamos desde aquí para toda Galicia. Unha dorna é unha barca pequena, feita a man e pensada para faenar con paciencia. Así queremos traballar.
Gústanos o ben feito, o sobrio e o que ten raíz. Preferimos que unha marca se pareza a si mesma antes ca á do lado.
CriterioPublicar menos, pero con sentido.
EleganciaUnha estética limpa e recoñecible.
Raíz galegaProximidade e coñecemento do territorio.
Blog
Ideas para contar mellor
Notas de traballo sobre contido, vídeo e redes. Sen fume.
Axuda a unha marca a que a atopen e a escollan en internet. Tamén se lle chama marketing dixital. Decide que contar, prodúceo en texto, foto e vídeo, publícao en redes e mide que funciona. En Dorna facémolo cun equipo pequeno: a mesma persoa que te escoita grava e edita.
Traballades en Santiago de Compostela e na Coruña?
Si. Estamos en Santiago de Compostela e traballamos nas catro provincias galegas: A Coruña, Lugo, Ourense e Pontevedra. Gravamos en persoa onde faga falta e o resto levámolo en liña.
Que ocorre na chamada?
Vinte ou trinta minutos para coñecernos. Cóntasnos que fai a túa marca e que necesitas, e nós dicímosche con sinceridade se podemos axudarte e como o faríamos. Non hai compromiso.
Canto custa unha axencia de marketing en Galicia?
Depende do que necesite cada marca: non é o mesmo coidar as redes que producir vídeo cada mes. Tras a chamada enviámosche unha proposta clara, con packs mensuais, o que inclúe e o que non.
Traballades con negocios pequenos?
Si. Moitas das marcas coas que encaixamos son negocios locais: comercio, hostalaría, turismo, adegas ou servizos. O importante non é o tamaño, senón ter algo que contar.
Por que traballades con poucas marcas á vez?
Porque preferimos facelo ben. Con poucas marcas á vez podemos coñecer de verdade cada proxecto e responder rápido.
Facedes tomas con dron?
Si, cando a peza o pide e o lugar o permite. Antes de voar comprobamos as zonas e as condicións, e respectamos a normativa vixente.
Traballades con intelixencia artificial?
Usámola como ferramenta para tarefas mecánicas como transcribir, subtitular ou analizar datos. As ideas, o ton e as decisións son nosas.
Teño que ter xa unha estratexia?
Non. De feito, moitas veces comezamos por aí: ordenar que queres contar e a quen.
Contacto
Falamos?
Cóntanos que ten a túa marca que contar. Reserva unha chamada ou escríbenos e respondémosche nun ou dous días.
A reserva faise en Calendly, que xestiona a cita por conta de Dorna Estudio. Máis información na política de privacidade.
Aviso legal
En cumprimento do artigo 10 da Lei 34/2002, de Servizos da Sociedade da Información e de Comercio Electrónico (LSSI-CE), estes son os datos do titular desta web.
Titular
Titular: Mario Fernández Pérez, traballador autónomo. Nome comercial: Dorna Estudio. NIF: 46095547M Domicilio: Bugallido, 18, Ames (A Coruña) Correo electrónico: infodornaestudio@gmail.com Teléfono: +34 684 73 71 28 Actividade: servizos de marketing, comunicación e creación de contido para redes sociais.
Rexistros, autorizacións e códigos de conduta
Como traballador autónomo, o titular non está inscrito no Rexistro Mercantil. A actividade non require autorización administrativa previa nin colexiación profesional, e o titular non está adherido a ningún código de conduta.
Estes termos regulan o acceso e o uso desta web, da que é titular Mario Fernández Pérez, que traballa co nome comercial Dorna Estudio (en diante, «Dorna Estudio»). Ao usar a web, e en particular ao enviar o formulario de contacto, aceptas estes termos na versión publicada nese momento.
1. Uso da web
A web é de acceso gratuíto. Comprométeste a usala de forma lícita e de boa fe. Non está permitido tentar acceder sen autorización aos seus sistemas, introducir programas daniños, enviar mensaxes masivas ou publicitarias a través do formulario nin suplantar outra persoa.
2. Formulario de contacto
Para enviar o formulario debes ser maior de idade e facilitar datos verdadeiros. Se escribes en nome dunha empresa, declaras que podes facelo. Enviar o formulario ou reservar unha chamada non te obriga a contratar nada, nin obriga a Dorna Estudio a prestar un servizo.
3. Información sobre os servizos
A web describe os servizos de forma xeral. Nada se contrata en liña: cada servizo contrátase mediante unha proposta ou orzamento por escrito que indica o alcance, o prezo (e se inclúe impostos), os prazos e as condicións. Se a proposta e a web non coinciden, prevalece a proposta.
4. Propiedade intelectual e industrial
Os textos, artigos, deseño, logotipo e nome comercial desta web pertencen a Dorna Estudio. As fotografías de banco de imaxes proceden de Pexels e úsanse conforme á súa licenza, con recortes e retoques propios; esa licenza non permite a terceiros reutilizalas desde esta web. Non podes reproducir, distribuír nin transformar os contidos sen permiso por escrito, agás citas breves que liguen á fonte.
5. Contidos do blog
Os artigos teñen carácter informativo e xeral. Non son asesoramento profesional para o teu caso e poden quedar desactualizados co tempo.
6. Ligazóns a outras webs
A web liga a servizos de terceiros, como Instagram, WhatsApp ou a ferramenta de reserva de chamadas Calendly. Dorna Estudio non controla eses sitios nin responde dos seus contidos nin das súas condicións, que debes revisar en cada un.
7. Dispoñibilidade e responsabilidade
Procuramos que a web funcione sen interrupcións e sen erros, pero non podemos garantilo. Na medida en que a lei o permita, Dorna Estudio non responde dos danos derivados de interrupcións técnicas, de fallos alleos ao seu control ou do uso da web contrario a estes termos.
Podemos actualizar estes termos cando cambie a web ou a normativa. A versión e a data figuran ao final. Ao enviar o formulario queda rexistrada a versión que aceptaches.
10. Lei aplicable e xurisdición
Estes termos réxense pola lei española. Para calquera controversia, as partes sométense aos xulgados e tribunais de Santiago de Compostela, agás que actúes como consumidor, caso en que será competente o xulgado do teu domicilio.
Versión 1.0 · 5 de novembro de 2026
Política de privacidade
Explicámosche como tratamos os teus datos persoais conforme ao Regulamento (UE) 2016/679 (RXPD) e á Lei Orgánica 3/2018 de Protección de Datos Persoais e garantía dos dereitos dixitais (LOPDGDD).
1. Responsable
Mario Fernández Pérez (nome comercial Dorna Estudio). NIF: 46095547M. Correo: infodornaestudio@gmail.com. Teléfono: +34 684 73 71 28. O resto de datos do titular figuran no aviso legal.
2. Que datos tratamos
Formulario de contacto: nome, correo electrónico, nome da túa marca ou proxecto (opcional) e a mensaxe. Só pedimos o necesario para responderche.
Rexistro de aceptación: ao enviar o formulario gardamos a data e hora, a versión dos termos e desta política, o texto exacto das caixas que marcaches, o idioma e a páxina. O servizo de formularios rexistra ademais o enderezo IP desde o que se envía.
Reserva de chamada: nome, correo, as respostas que deas ao reservar e a data e hora da cita.
Correo, teléfono, WhatsApp ou Instagram: os datos que nos facilites ao escribirnos ou chamarnos.
Clientes: se chegas a contratar, os datos necesarios para prestar o servizo e facturar.
3. Para que os usamos e con que base legal
Responder á túa consulta e preparar unha proposta se nola pides. Base legal: aplicación de medidas precontractuais a petición túa (art. 6.1.b RXPD).
Gardar o rexistro de aceptación, para poder demostrar cando e como aceptaches os termos e fuches informado sobre privacidade. Base legal: o noso interese lexítimo en acreditar o cumprimento da normativa (art. 6.1.f RXPD e art. 5.2 RXPD).
Xestionar a relación con clientes e facturar. Base legal: execución do contrato (art. 6.1.b RXPD) e cumprimento de obrigas fiscais e contables (art. 6.1.c RXPD).
Non enviamos publicidade nin boletíns sen o teu consentimento previo e expreso, non elaboramos perfís e non tomamos decisións automatizadas sobre ti.
4. Canto tempo os conservamos
Consultas que non acaban en contratación: ata 12 meses desde o último contacto.
Reservas de chamada: ata 12 meses desde a data da cita.
Rexistro de aceptación: mentres conservemos os teus datos e, despois, bloqueado durante o prazo en que se poidan esixir responsabilidades (ata 3 anos).
Clientes: mentres dure a relación e, despois, durante os prazos que esixe a normativa fiscal e mercantil (en xeral, de 4 a 6 anos).
5. Quen pode acceder aos teus datos
Non cedemos os teus datos a terceiros salvo obriga legal. Traballamos con estes provedores, que acceden a eles só para prestarnos o seu servizo:
Netlify, Inc. (Estados Unidos): aloxamento da web e recepción do formulario, como encargado do tratamento.
Calendly LLC (Estados Unidos): reserva de chamadas, como encargado do tratamento.
Google (Estados Unidos): correo electrónico.
A asesoría que leva a nosa contabilidade, só cos datos de facturación de clientes.
Se nos escribes por WhatsApp ou Instagram, Meta trata ademais os teus datos como responsable segundo as súas propias políticas.
6. Transferencias internacionais
Netlify, Calendly e Google poden tratar datos nos Estados Unidos. As tres están adheridas ao Marco de Privacidade de Datos UE-EUA, que a Comisión Europea recoñece como garantía axeitada, e aplican tamén cláusulas contractuais tipo cando procede.
7. Os teus dereitos
Podes pedir o acceso aos teus datos, a súa rectificación ou supresión, a limitación do tratamento, a portabilidade e opoñerte ao tratamento baseado en interese lexítimo. Escríbenos a infodornaestudio@gmail.com indicando que dereito exerces; se é necesario pedirémosche que acredites a túa identidade. Responderemos no prazo dun mes. Se cres que non tratamos ben os teus datos, podes reclamar ante a Axencia Española de Protección de Datos (www.aepd.es).
8. Datos obrigatorios e menores
Os campos marcados como obrigatorios son necesarios para responderche; sen eles non podemos atender a túa consulta. Os nosos servizos diríxense a profesionais e empresas, e non tratamos a sabendas datos de menores de 14 anos.
9. Seguridade e cambios
Aplicamos medidas técnicas e organizativas axeitadas para protexer os teus datos. Se cambiamos esta política, publicaremos a nova versión coa súa data; o rexistro de cada envío garda a versión vixente nese momento.
Versión 1.0 · 5 de novembro de 2026
Política de cookies
Esta web non instala cookies e non usa analítica, publicidade nin ferramentas de seguimento. Por iso non che mostramos un aviso de cookies nin che pedimos consentimento.
Que gardamos no teu navegador
Só dúas preferencias, e unicamente se as escolles ti cos botóns da cabeceira. Gárdanse no almacenamento local do teu navegador, non se envían a ningún servidor e non serven para identificarte.
Nome
Para que serve
Canto dura
De quen é
dorna-lang
Lembrar o idioma que escolliches
Ata que o borres
Propia
dorna-theme
Lembrar se escolliches o modo claro ou escuro
Ata que o borres
Propia
Segundo a Guía sobre o uso das cookies da Axencia Española de Protección de Datos, o almacenamento que garda unha preferencia escollida polo propio usuario, como o idioma, está exento do deber de pedir consentimento (art. 22.2 LSSI-CE). Podes borralo cando queiras desde os axustes do teu navegador.
Tipografías
As tipografías sérvense desde o noso propio aloxamento, así que o teu navegador non se conecta a servidores de terceiros para cargalas.
Ligazóns a outros sitios
Se reservas unha chamada (Calendly) ou abres o noso perfil de Instagram ou WhatsApp, sairás a webs de terceiros que poden usar as súas propias cookies segundo as súas políticas.
Cambios
Se no futuro engadimos analítica ou outras ferramentas que usen cookies non exentas, actualizaremos esta política e pedirémosche o consentimento antes de activalas, coa mesma facilidade para aceptar que para rexeitar.
Versión 1.0 · 5 de novembro de 2026
Declaración de accesibilidade
Queremos que esta web a poida usar calquera persoa, con independencia das súas capacidades ou do dispositivo que utilice. O noso obxectivo é cumprir as Pautas de Accesibilidade para o Contido Web (WCAG) 2.2, nivel AA.
Que facemos
Estrutura semántica con encabezados ordenados e zonas identificadas.
Navegación completa con teclado, foco sempre visible e ligazón para saltar ao contido.
Contraste suficiente de texto e fondo, tanto en modo claro como en modo escuro.
Textos alternativos nas imaxes, etiquetas en todos os campos do formulario e mensaxes de erro xunto a cada campo.
Lapelas, acordeóns e ventás con roles e estados accesibles para lectores de pantalla.
Respecto á preferencia do sistema de reducir movemento: as animacións desactívanse.
Textos que se poden ampliar e deseño adaptable a móbil, tableta e escritorio.
Limitacións coñecidas
Non se realizou aínda unha auditoría externa, polo que é posible que algunha parte non cumpra de todo. Seguimos mellorando.
Cóntanos se atopas un problema
Se algo non che funciona ou necesitas a información noutro formato, escríbenos a infodornaestudio@gmail.com ou chama ao +34 684 73 71 28 e solucionarémolo canto antes.
Última revisión: novembro de 2026
En poucos anos, a intelixencia artificial pasou de ser unha curiosidade a formar parte do día a día de calquera equipo de marketing. Pero o que máis cambiou non é a velocidade. É que cousas son escasas.
O que cambiou de verdade
Producir é barato. Bosquexos, subtítulos, traducións, resumos ou variacións dun mesmo anuncio, que antes levaban horas, hoxe levan minutos.
Analizar é máis fácil. Resumir centos de comentarios, atopar patróns nas métricas ou detectar que pezas reteñen mellor xa non esixe unha folla de cálculo interminable.
Buscar xa non é só Google. Os asistentes e os resumos automáticos dos buscadores responden directamente. As marcas necesitan información clara, útil e coherente en todos os seus canais para seren mencionadas.
Personalizar a escala. Adaptar unha mesma mensaxe a distintos públicos é máis sinxelo ca nunca.
A trampa: todo o mundo produce o mesmo
Se todos usan as mesmas ferramentas coas mesmas instrucións, o resultado parécese. Contido correcto, limpo e esquecible. Cando producir é case gratis, o valioso pasa a ser o criterio: saber que dicir, que calar e como soa a túa marca.
Cando todo o mundo pode producir, destaca quen sabe escoller.
Onde usamos IA nós
Usámola para transcribir e subtitular, ordenar ideas, preparar bosquexos de guión e analizar comentarios e métricas. Non a usamos para decidir a idea, fixar o ton, gravar nin dar o visto bo final. Iso segue sendo traballo de persoas.
Cinco regras sinxelas para unha marca
Usa a IA para acelerar, non para decidir.
Define antes a túa voz: tres adxectivos e exemplos de frases que si e que non dirías.
Revisa todo con ollos humanos, sobre todo datos, cifras e afirmacións.
Sé transparente cando importe, por exemplo se unha imaxe está xerada.
Investe o tempo aforrado no que non se automatiza: escoitar, visitar, gravar e falar coa túa xente.
A IA non acabou co marketing. Subiu o listón do que se considera bo.
Ninguén pode garantir que un vídeo sexa viral. Pero si se pode reducir o azar: case todos os vídeos que funcionan comparten unha estrutura parecida.
A estrutura en cinco bloques
Gancho (0 a 3 segundos). Unha promesa, unha pregunta ou o resultado final por diante. Sen saúdo, sen logotipo e sen presentación. Se en tres segundos non hai unha razón para quedar, desliza.
Contexto mínimo (3 a 8 segundos). Unha frase que explique por que isto lle importa a quen mira.
Desenvolvemento con xiros. Unha soa idea por vídeo. Cambia de plano ou de información cada dous a catro segundos e deixa unha pregunta aberta que só se pecha ao final.
Recompensa. Entrega o prometido, de forma clara. A xente perdoa un vídeo curto, non un que engana.
Peche. Unha acción pequena (gardar, enviar a alguén, comentar) ou un final que enlaza co principio para que se vexa outra vez.
Que miran as plataformas
Sobre todo, canta xente chega ata o final, cantas persoas o volven ver e cantas o gardan ou o envían a outra persoa. Un vídeo que alguén lle manda a un amigo cun "mira isto" pesa moito máis ca dez gústames.
Erros que máis vemos
Introducións longas antes de dicir nada.
Música tan alta que tapa a voz.
Sen subtítulos, cando moita xente mira sen son.
Varias ideas nun só vídeo.
Un final que se apaga en lugar de pechar.
Exemplo de guión de 25 segundos
Gancho: "Isto é o que case todas as marcas fan mal na súa primeira publicación." Contexto: "E arránxase en menos dun minuto." Desenvolvemento: tres planos rápidos, un por cada erro, cunha frase curta cada un e un texto en pantalla. Recompensa: a solución nunha soa frase. Peche: "Gárdao para a túa próxima publicación" e un último plano que conecta co primeiro.
Mide, axusta e repite
Revisa en que segundo se perde a xente e corrixe ese punto no seguinte vídeo. A viralidade raramente chega cunha peza solta. Adoita chegar de ir mellorando tanda a tanda.
A idea de que hai que publicar todos os días quedou vella. As redes premian cada vez máis a atención real e menos a frecuencia.
O problema do volume
Publicar por publicar esgota o equipo, dilúe a marca e ensina o público a ignorarte. Un perfil cheo de pezas intercambiables parécese a todos os demais.
Constante non é o mesmo que continuo
Un ritmo sostible, de dúas ou tres pezas boas por semana, gaña a unha racha de quince días seguida dun mes de silencio. A regularidade constrúese cun calendario que poidas cumprir.
Tres preguntas antes de publicar
Soa a nós?
Importa a quen nos segue?
Se non o publicamos, alguén botaríao en falta?
Se dúas respostas son non, a peza non sae.
Como se organiza
Un tema por semana, pezas que se apoian unhas noutras e unha peza áncora, máis traballada, con outras máis lixeiras ao redor. Así cada publicación suma á anterior en lugar de comezar de cero.
Internet xa non quere anuncios. Quere criterio.
O que gañas
Tempo para facelo mellor, coherencia visual e de ton, e unha marca que se recoñece sen ver o logotipo. Esa é a diferenza entre encher un perfil e construír unha marca.
Un móbil actual grava cunha calidade máis que suficiente para redes. O que separa un vídeo afeccionado dun profesional case nunca é o aparello.
1. A luz, primeiro
Coloca a quen grava de cara a unha fiestra. Evita o contraluz forte e a luz dura do mediodía. Unha luz suave, como a de primeira ou última hora do día, mellora máis unha imaxe ca calquera axuste.
2. Estabilidade
Usa un tripé ou apoia os cóbados no corpo. Se camiñas, dá pasos curtos e flexiona os xeonllos. Un plano firme percíbese como profesional aínda que non pase nada espectacular.
3. Formato
Vertical 9:16 para reels. En 4K a 24 ou 30 imaxes por segundo para un aspecto máis cinematográfico, ou a 60 se queres poder ralentizar.
4. Bloquea exposición e foco
Mantén premido sobre o suxeito ata que apareza o bloqueo. Así o brillo e o foco non oscilan a metade de plano.
5. Limpa a lente
Unha pegada na lente produce imaxes leitosas e sen contraste. Pasa un pano limpo antes de cada sesión.
6. O audio importa máis ca a imaxe
Achega o micrófono a quen fala, usa un de solapa se podes e evita o vento e os espazos con eco. A xente tolera unha imaxe mediocre, pero non un audio malo.
7. Planos variados
Un plano xeral para situar, un medio para contar e un de detalle para dar textura. Grava cada acción nos tres e terás material para montar con ritmo.
O criterio nótase máis ca o aparello.
E un último detalle: deixa aire arriba e abaixo do encadre. Os textos e os botóns da aplicación ocupan parte da pantalla.
Un plano aéreo pode cambiar como se ve un lugar en tres segundos. Usado sen motivo, é só decoración.
Que achega
Contexto: onde está o que contas.
Escala: canto de grande, de longo ou de diverso é.
Movemento revelador: mostrar algo que non se vía e descubrilo ante o espectador.
Cando suma
Para abrir un vídeo e situar o público, para mostrar o contorno dun lugar, como transición entre escenas ou como peche que deixa respirar a peza.
Cando sobra
Cando non conta nada que non conte un plano a pé de chan, ou cando é o único que hai. Un vídeo sen persoas nin detalle, só con planos aéreos, vólvese frío.
Movementos que funcionan
Subida con revelación: comezar cun elemento en primeiro plano e descubrir a paisaxe.
Órbita lenta arredor dun punto de interese.
Travelling lateral con algo en primeiro plano para dar profundidade.
Picado cenital, perpendicular ao chan, para composicións gráficas.
Cada plano, de dous a catro segundos. Para reels, grava en vertical real se o dron o permite, en lugar de recortar un plano horizontal.
Antes de voar
Voar con dron esixe estar rexistrado como operador ante AESA, respectar a altura máxima, non sobrevoar persoas nin aglomeracións e comprobar se a zona está restrinxida. A aplicación ENAIRE Drones amosa as zonas. Con vento forte ou mala visibilidade, non se voa. A normativa cambia, así que confirma sempre a vixente antes de despegar.
Por iso o incluímos no noso traballo, pero só cando a peza o pide e o lugar o permite.
Os seguidores son o número máis fácil de ver e o que menos di.
O que convén mirar
Retención: que porcentaxe do vídeo se ve e en que segundo se marcha a xente.
Envíos e gardados: indican que alguén o considera útil ou digno de compartir.
Alcance en non seguidores: mostra se o teu contido chega máis aló dos que xa te coñecen.
Visitas ao perfil e seguidores novos por peza: que publicacións atraen de verdade.
Calidade dos comentarios e mensaxes: unha pregunta concreta vale máis ca dez emojis.
O que importa ao negocio
Consultas, mensaxes, reservas e visitas á web. Apunta de onde chega cada unha e pregunta sempre "como nos coñeciches?". Esa resposta vale máis ca calquera panel.
O que convén ignorar
Os gústames illados.
Os picos dun só día.
As comparacións con contas dun tamaño ou un sector moi distintos.
Un ritual mensual de media hora
Responde a tres preguntas: que pezas funcionaron e por que, cales non funcionaron e por que, e que decisión tomas para o mes seguinte. Unha decisión, non dez.
Medir serve para decidir, non para decorar.
Por iso cada mes entregamos un informe con estas métricas e tres decisións claras para o mes seguinte.
Santiago de Compostela
